''Արմեդա'' մշակութային ակումբը

Շուրջ մեկ տարի է, որ Հայկական բժշկական ասոցիացիայի կազմում գործում է «Արմեդա» մշակութային ակումբը։ Այստեղ` Տերյան 72 հասցեում ազատ ժամանակ իրենց հանգիստն են անցկացնում ոչ միայն ասոցիացիայի անդամները այլև բժշկական աշխարհի ամենատարբեր մարդիկ։

Այս հարմարավետ կահավորված սրահում, սովորաբար սուրճի գավաթի շուրջ, ոչ պաշտոնական մթնոլորտում հայ բժիշկները հանդիպում են, մտերմաբար պատմում իրենց ձեռքբերումների մասին, ինչպես նաև զրուցում հոգևոր-մշակութային կյանքի շուրջ։ Այստեղ ինքնաբուխ ծնունդ են առնում նաև մշակութային միջոցառումների ծրագրեր, որոնք հաջողությամբ իրականցվում են ասոցիացիայի համապատասխան ստորաբաժանումների կողմից։

Այս անգամ ուզում ենք պատմել ակումբի բազմաբնույթ միջոցառումներից մեկ ուղղության մասին։ Նույնիսկ դժվար է ասել, թե առաջինը ում մտքով անցավ, կամ ով առաջարկեց համագործակցել թատերարվեստի ներկայացուցիչների հետ` առողջապահության բնագավառի մարդկանց առավել մոտիկից հաղորդակից դարձնելու համար հայ բեմարվեստին։ Սակայն գաղափարը անմիջապես կյանքի կոչվեց և այդ ինքնատիպ գաղափարը դարձավ իրականություն։ Ավելին, Սունդուկյանի անվան պետական դրամատիկական թատրոնի ղեկավարության հետ պայմանավորվածություն ձեռք բերվեց բուժաշխատողների համար պարբերաբար կազմակերպել կոլեկտիվ դիտումներ, իսկ ներկայացումից անմիջապես հետո` նաև քննարկումներ։ Նման առաջին իսկ միջոցառումը պսակվեց աննախադեպ հաջողությամբ։ Նույնիսկ թատերարվեստի գործիչների կարծիքով անակնկալ էր, որ առողջապահության ոլորտի աշխատակիցները այդքան ջերմ վերաբերմունք ունեին դեպի բեմարվեստը ու նաև այդքան խոր գիտելիքներ` ըստ արժանվույն գնահատելու իսկական ձեռքբերումները և մատնանշելու նաև «թերությունները»...

Համագործակցություն, որի հիմնական գաղափարակիրը Երևանի պետական բժշկական համալսարանի հոգեբանության ամբիոնի վարիչ Խաչատուր Գասպարյանն էր, իրոք կայացավ։

Շուրջ մեկ տարվա ընթացքում Գ. Սունդուկյանի անվան թատրոնում կազմակերպվեցին այսպիսի մի շարք դիտում-քննարկումներ։ Սունդուկյանցիները արդեն իսկ բժիշկ-հանդիսատեսի «դատին են հանձնել» Ալեքսանդր Շիրվանզադեի «Պատվի համար» (ռեժիսոր` թատրոնի գեղարվեստական ղեկավար, ՀՀ ժողովրդական արտիստ Վահե Շահվերդյան), ինչպես նաև ռեժիսոր Սուրեն Շահվերդյանի բեմադրությամբ Լուկաս Բերֆուսի «Մեր ծնողների նևրոզները», Ֆեդերիկո Գարսիա Լորկայի «Բեռնարդան և նրա աղջիկները», Ժան Ժենեի «Աղախինները» ներկայացումները։ Հանդիպումից հանդիպում բուժաշխատողների և թատերարվեստի ներկայացուցիչների կապը ավելի է ջերմանում, առավել առարկայական են ուրվագծվում հետագա փոխհամագործակցությունները։

Հայկական բժշկական ասոցիացիան որոշեց նաև հյուրընկալվողից անցում կատարել հյուրընկալողի դերին։ Պետք չէ շտապել, հարգելի ընթերցող, և մտածել, թե նշված հաջորդ քայլին հայ բժիշկները «փոխեցին իրենց մասնագիտությունը» և ներկայացում բեմադրեցին դերասանների համար։ Ոչ, պարզապես «Արմեդա» ակումբի սրահը պարզվեց, որ ամենևին էլ վատ ասպարեզ չէ հետաքրքիր ներկայացում բեմադրելու համար և Սերգեյ Դանիելյանի «Սերոժիկ» մոնոներկայացումը «բեմադրվեց» ասոցիացիայի ակումբում (քանի որ ակումբի սրահը բեմ չունի այդ պատճառով ենք բեմադրվեց բառը առնում չակերտի մեջ)։

Վերջում ուզում ենք հիշեցնել, որ ակումբի դռները բաց են բոլորի համար, իսկ կազմակերպվող միջոցառումների մասին մանրամասն տեղեկատվություն կարող եք գտնել www.armeda.am/club ինտերնետային էջում։

Հարցեր, պատասխաններ, մեկնաբանություններ